Ироаи Паёми Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки ба санаи 16-уми декабри соли 2025 рост омад, барои зиндагии мардум саҳифаи нави пешравиву комёбиҳоро боз намуд. Ҳукумати мамлакат бо роҳбарии Пешвои миллат тамоми кӯшишҳоро баҳри таъмин намудани зиндагии босаодати мардум равона сохтанд.

Таърихи санаи 3-уми марти соли 2025 барои мардуми тоҷик хотирмон буд. Зеро дар ин сана интихоботи Вакилони Халқ – 2025 дар фазои демократӣ, шаффоф ва бо руҳияи болидаи мардум ҷараён гирифт. Ин рӯйдод боварии мардумро ба давлат ва ояндаи босаодати худ боз ҳам қавӣ намуд. Дар ҷомеаи демократӣ, ҳуқуқбунёд, дунявӣ ва ягона халқ аз ҳуқуқу манфиатҳои худ бархурдор ҳастанд ва сокинони кишвар бо истифода аз ҳуқуқҳои худ дар интихоботи вакилони халқ фаъолона бо ҳисси баланди масъулиятшиносиву ватандӯстӣ дар он ширкат варзиданд. Ҷараёни интихоботи вакилони халқ собит сохт, ки мардум ба ояндаи худ бетараф нест ва райъи худро ба ҳизби боваринок доданд.

Қайд кардан ба маврид аст, ки ҳамзамон зимни ироаи Паём, Пешвои миллат муҳтарам Эмомалӣ Раҳмон вобаста ба ҳалли пурраи масъалаҳои сарҳадӣ, ки дар давоми сад соли охир зиндагии мардуми ду кишвар Ҷумҳурии Тоҷикистон ва Ҷумҳурии Қирғизистонро ташвиш медод суханронӣ намуданд. Гуфта шуд, ки бо талошҳо ниҳоят ҷонибҳо соли 2025 бо имзои шартнома дар бораи муайян кардани хатти сарҳади давлатӣ ҳалли пурраи масъаларо пайдо карданд. Дар вақеъ ин дастоварди беназири даврони Истиқлол бори дигар собит сохт, ки фарзанди фарзонаи халқи тоҷик бо иродаву азми некбинонаи худ қодир аст, ки роҳи ҳалли тамоми мушкилотро пайдо кунад. Саодати зиндагии мардум аз дустӣ аст ва ин фалсафаро Пешвои муаззами миллати тоҷик дар амал собит намуданд. Таърих дар тӯли ҳазорсолаҳо ин азми қавии роҳбари давлатро фаромӯш нахоҳад кард. Ҳамзамон ба имзо расидани шартнома миёни Ҷумҳурии Тоҷикистон, Ҷумҳурии Қирғизистон ва Ҷумҳурии Ӯзбекистон дар бораи нуқтаи пайвастшавии сарҳади давлатии се кишвар ва Эъломияи Хуҷанд доир ба дӯстии абадӣ аз ҷониби сарони давлатҳо, яке аз дастовардҳои наҷиби соли 2025 мебошад. Аз қадиммулайём мардуми сарбаланди тоҷик меҳмондӯст, сулҳҷӯ ва сулҳофар буданд, ки онро дар асарҳои шахсиятҳои барҷастаи халқи тоҷик ба монанди асари безаволи “Шоҳнома”-и ҳаким Абулқосими Фирдавсӣ дидан мумкин аст. Дӯстии абадӣ на танҳо барои рушди минтақа ва идомаи ҳамкориҳои судманд заминаи мустаҳками ҳуқуқиро фароҳам меоварад, балки, тавассути он мардуми ҳар се кишвар, ки аксарият муносибати хешутаборӣ низ доранд содати зиндагии худро муҳайё месозанд. Дар таърихи башарият ин гуна рӯйдодҳо кам ба назар мерасанд. Вақт собит сохт, ки Пешвои миллат ба хотири осоиштагии мардум, хушбахтии онҳо ва фароҳам овардани зиндагии босаодати халқ тавонистанд ҳамсоягонро ба худ дуст кунанд ва тамоми кӯшишҳои худро равона намоянд.

Инчунин, дар Паёми Пешвои миллат ба Маҷлиси Олӣ тамоми соҳаҳои ҳоҷигии халқ аз ҷумла иқтисодӣ, иҷтимоӣ, кишоварзӣ, фарҳанг, маориф ва ба дигар соҳаҳо фаро гирифта шуда, натиҷаҳо таҳлилу баён карда шуданд. Таҳлилҳо нишон доданд, ки дар баробари пешравиҳои назаррас инчунин камбудиҳо ҷой доранд, ки Пешвои миллат ҷиҳати ҳалли он масъулинро вазифагузорӣ намуданд. Пеш аз ҳама роҷеъ ба ҳуввияти миллӣ, эҳтиром ба арзишҳои ниёгон ва даст кашидан аз бегонапарастӣ яке аз нуктаҳои асосии Паём маҳсуб меёбад. Воқеан ҳам, ҳар фарди ба нангу номус, ки худро мансуб ба дини мубини ислом медонад бояд бо виҷдони пок баҳри ҳифзи Ватани азизамон камари ҳиммат бандад. Зеро танҳо мо мардуми тоҷик метавонем, ки худро ҳифз кунем ва ба наслҳои ояндаи худ як кишвари ободу зеборо мерос гузорем.

Муҳайё Ҳотамова, устоди Донишкадаи политехникии

Донишгоҳи техникии Тоҷикистон ба номи академик М.С.Осимӣ

дар шаҳри Хуҷанд