Ба шарофати соҳибистиқлолии мамлакат Ҷумҳурии Тоҷикистон дар тӯли 34 соли пешрафти хеш бо роҳбарии Пешвои миллат муҳтарам Эмомалӣ Раҳмон ба дастовардҳои назаррас ноил гардида истодааст, ки онро пеш аз ҳама мардуми шарифи Тоҷикистон аз Паёми ҳамасолаи Президенти кишвар ҳис менамоянд.

Паёми Пешвои миллат — ин барномаи солонаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олӣ мебошад, ки дар он натиҷаҳои асосии фаъолияти давлат дар соли гузашта ҷамъбаст шуда, самтҳо ва вазифаҳои афзалиятноки сиёсати дохилӣ ва хориҷӣ барои солҳои минбаъда муайян мегарданд.

Паём ҳамчун ҳуҷҷати роҳнамо барои Ҳукумат, вазорату идораҳо ва тамоми ҷомеа хизмат мекунад ва иҷрои он заминаи рушди устувори кишварро фароҳам меорад.

Паёми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ, ки санаи 16.12.2025 ироа гардид, ҳамчун ҳуҷҷати муҳимми сиёсиву барномавӣ самтҳои асосии рушди иҷтимоии кишварро муайян намуда, ба беҳбудии сатҳи зиндагии аҳолӣ таваҷҷуҳи хос зоҳир менамояд. Дар ин Паём масъалаҳои иҷтимоӣ яке аз самтҳои калидӣ маҳсуб ёфта, ҳадафи асосӣ таъмини зиндагии шоиста барои ҳар як шаҳрванди кишвар арзёбӣ мегардад.

Яке аз масъалаҳои муҳимми иҷтимоӣ, ки дар Паёми навбатӣ мавриди таваҷҷуҳ қарор гирифт, таъмини шуғли аҳолӣ ва коҳиш додани сатҳи камбизоатӣ мебошад. Пешвои миллат таъкид намуданд, ки рушди иқтисоди миллӣ бояд пеш аз ҳама ба таъсиси ҷойҳои нави корӣ, дастгирии соҳибкории хурду миёна ва баланд бардоштани даромади аҳолӣ равона карда шавад. Дар ин замина, ҷалби сармоя, рушди истеҳсолоти ватанӣ ва касбомӯзии шаҳрвандон аҳамияти калон дорад.

Маориф ва тандурустӣ ҳамчун ду пояи асосии рушди иҷтимоӣ дар маркази сиёсати давлат қарор доранд. Дар Паём таъкид гардид, ки баланд бардоштани сифати таҳсил, сохтмони муассисаҳои нави таълимӣ, ҷорӣ намудани технологияҳои рақамӣ ва омода намудани мутахасисони баландихтисос аз вазифаҳои муҳими соҳа арзёбӣ гардид.

Масъалаи ҳифзи иҷтимоии аҳолии ниёзманд, аз ҷумла нафақахӯрон, маъюбон, ятимон ва оилаҳои камбизоат низ дар Паёми Пешвои миллат ҷойгоҳи хоса дорад. Баланд бардоштани ҳаҷми нафақа ва кӯмакпулиҳо, инчунин тақвияти барномаҳои иҷтимоӣ нишонаи равшани сиёсати иҷтимоии инсонмеҳвари давлат мебошад.

Илова бар ин, Пешвои миллат ба масъалаҳои ҷавонон ва занон таваҷҷуҳи махсус зоҳир намуданд. Фароҳам овардани шароити мусоид барои таҳсил, кор ва иштироки фаъоли онҳо дар ҳаёти ҷамъиятӣ ҳамчун омили муҳими рушди устувори кишвар арзёбӣ шуд.

Дар маҷмӯъ, муҳтавои Паёми Президенти мамлакат муҳтарам Эмомалӣ Раҳмон ба Маҷлиси Олӣ шаҳодат аз он медиҳад, ки сиёсати иҷтимоии Ҷумҳурии Тоҷикистон ба рушди инсон, таҳкими адолати иҷтимоӣ ва баланд бардоштани некӯаҳволии мардум равона шудааст. Амалӣ гардидани ҳадафҳои дар Паём зикршуда метавонад заминаи устувор барои пешрафти минбаъдаи ҷомеаи Тоҷикистон фароҳам оварад.

А. Темирхоҷаев,

устоди ДПДТТ ба номи академик М.Осимӣ

дар ш. Хуҷанд